Акафист — это особая церковная молитва в форме песнопения, которая восхваляет святого.

Кондак 1

Избра́нный чудотво́рче и пресла́вный уго́дниче Христо́в,/ ве́рный о нас предста́телю,/ о́тче пра́ведный Алекса́ндре,/ Правосла́вныя Це́ркве свети́льниче многосве́тлый/ и гра́да Во́логды дража́йшее украше́ние!/ Велича́юще Просла́вльшаго тя Го́спода, воспева́ем ти похва́льная./ Ты же те́плыми моли́твами от тя́жких нас бед свободи́, зову́щих:// Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

И́кос 1

Со А́нгелы светлогла́сную песнь воспои́м, лю́дие, сла́вному па́стырю Волого́дскому, пра́ведному Алекса́ндру, у́мнаго де́лания руководи́телю, покая́ния учи́телю, к душеспаси́тельному жи́тельству путеводи́телю, изнемо́гшим в борьбе́ со страстьми́ помо́щнику ве́рну и всем христиа́ном прибе́жищу, зову́ще си́це:

Ра́дуйся, от младе́нства Бо́га возлюби́вый;

ра́дуйся, ум свой в Бо́зе утверди́вый.

Ра́дуйся, моли́твою душе́вное о́ко просвети́вый;

ра́дуйся, посто́м пла́мень страсте́й угаси́вый.

Ра́дуйся, го́рдость жите́йскую возненави́девый;

ра́дуйся, смире́ние богоприя́тное возлюби́вый.

Ра́дуйся, гра́да Нико́льска до́брое прозябе́ние;

ра́дуйся, кра́я Во́логодскаго благо́е украше́ние.

Ра́дуйся, Це́ркви Ру́сския похвале́ние;

ра́дуйся, земли́ на́шея утвержде́ние.

Ра́дуйся, Небе́снаго Иерусали́ма граждани́не;

ра́дуйся, Ца́рствия Бо́жия насле́дниче.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 2

Ви́дя се́рдце твое́ чи́сто и ду́шу просвеще́ну, о́тче Алекса́ндре, показа́ тя Христо́с вмести́лище му́дрости Боже́ственныя и положи́ тя ю́ным наста́вника и учи́теля, до́брое науче́ние во умы́ отроко́в влага́юща, науча́юща мирска́го суему́дрия избега́ти, Бо́гу же взыва́ти: Аллилу́иа.

И́кос 2

Ра́зум Небе́сный стяжа́в, презре́л еси́ ми́ра красоту́, я́ко су́етну, возлюби́л же еси́ богомы́слия и молча́ния добро́ту; поноше́ния и ско́рби претерпе́л еси́, о́тче, Христу́ вседу́шно подража́я, мы же, дивя́щеся таково́му житию́ твоему́, вопие́м ти:

Ра́дуйся, ба́нею покая́ния ду́шу соверше́нне очи́стивый;

ра́дуйся, воздержа́ния водо́ю оби́льно ю́ напои́вый.

Ра́дуйся, доброде́тели мно́ги в себе́ возрасти́вый;

ра́дуйся, дел благи́х плоды́ сладча́йшия вкуси́вый.

Ра́дуйся, ско́рби препобеди́вый благоду́шием;

ра́дуйся, на поноше́ния отвеща́вый благослове́нием.

Ра́дуйся, Пресвяты́я Богоро́дицы пла́менный люби́телю;

ра́дуйся, ико́н Ея́ честны́х усе́рдный почита́телю.

Ра́дуйся, о ни́щих и стра́ждущих хода́таю ско́рый;

ра́дуйся, о гре́шных и немощны́х предста́телю те́плый.

Ра́дуйся, высоту́ смире́ния и благоче́стия нам яви́вый;

ра́дуйся, сосу́д Ду́ха Свята́го ся соде́лавый.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 3

Си́лою Вы́шняго дар сло́ва пребога́тый получи́л еси́, о́тче Алекса́ндре, и́мже неле́ностно послужи́л еси́ наро́ду Бо́жию, неуста́нно наставля́я и поуча́я чад свои́х житию́ христиа́нскому, да отве́ргнут собла́зны ве́ка сего́ лука́ваго, наипа́че же бу́дущия жи́зни возжела́ют и Христу́ воззову́т: Аллилу́иа.

И́кос 3

Ви́дя благочести́вое и благогове́йное житие́ твое́, пра́ведне Алекса́ндре, поста́ви тя Госпо́дь на све́щнице высо́цем, свяще́нства да́ром обогати́в, ты же служе́ние сие́ всеблагогове́йно проше́д, мзду блага́го иконо́мства улучи́л еси́, те́мже и слы́шиши от всех си́це:

Ра́дуйся, лю́дем христолюби́вым предо́брый наста́вниче;

ра́дуйся, Це́ркви Бо́жия непоро́чный служи́телю.

Ра́дуйся, богому́драго разсужде́ния свеще́ боговозжже́нная;

ра́дуйся, благода́тнаго жития́ лампа́до светосия́ющая.

Ра́дуйся, уте́шителю скорбя́щих преди́вный;

ра́дуйся, боля́щих исцели́телю милосе́рдый.

Ра́дуйся, чуде́с неиссяка́емый исто́чниче;

ра́дуйся, гра́да твоего́ непоколеби́мый опло́те.

Ра́дуйся, стро́потных и злонра́вных ти́хое исправле́ние;

ра́дуйся, лени́вых и неве́рных кро́ткое обличе́ние.

Ра́дуйся, свети́льниче златоза́рный и всесве́тлый;

ра́дуйся, моли́твенниче неусы́пный и дерзнове́нный.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 4

Бу́рю злых страсте́й моле́нием утиша́я, се́рдце сле́зным покая́нием очища́я, обре́л еси́ ве́лие смире́ние души́ и дерзнове́ние предстоя́ти олтарю́ Госпо́дню непоро́чно, Же́ртву Безкро́вну вознося́ за вся лю́ди, душе́ю веселя́ся, ли́ком просвеща́яся, се́рдцем же поя́ Го́сподеви Бо́гу: Аллилу́иа.

И́кос 4

Лю́дие вси во́логодстии, приходя́ще к тебе́, удивля́хуся словесе́м твои́м прему́дрым и подвиго́м изря́дным, о́тче богоизбра́нне, и сла́вляху Бо́га на́шего. Ты же, блаже́нне, всем сло́во науче́ния неле́ностно предлага́ше, вопию́щим такова́я:

Ра́дуйся, пропове́дниче златослове́сне;

ра́дуйся, наста́вниче богоглаго́ливе.

Ра́дуйся, та́ин Бо́жиих возвести́телю;

ра́дуйся, жи́зни во Христе́ учи́телю.

Ра́дуйся, Святы́я Евхари́стии тре́петный служи́телю;

ра́дуйся, Же́ртвы Безкро́вныя усе́рдный соверши́телю.

Ра́дуйся, Све́том Нетва́рным во олтари́ просвеща́выйся;

ра́дуйся, тем Моисе́ю Богови́дцу уподо́бивыйся.

Ра́дуйся, ве́тхое десятосло́вие непоро́чно сохрани́вый;

ра́дуйся, но́вая блаже́нства всеусе́рдно испо́лнивый.

Ра́дуйся, святы́х и преподо́бных отце́в почита́телю;

ра́дуйся, подвиго́в и моле́ний их подража́телю.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 5

Богоблаже́нне о́тче Алекса́ндре, твои́ми богоприя́тными моли́твами хля́би небе́сныя заключа́хуся и дождь преста́яше, слепи́и прозрева́ху и хро́мии бо́дро возстава́ху, ни́щии насыща́хуся, и винопи́йцы от греха́ отвраща́хуся, и мно́зи боля́щии, исцеле́ние получи́вше, воспева́ху Бо́гови: Аллилу́иа.

И́кос 5.

Внегда́ лю́дие гра́да твоего́ о по́мощи моли́ша свята́го Иоа́нна, вели́каго па́стыря Кроншта́дтскаго, той ука́зоваше на тя, о́тче милосе́рдый, я́ко на обре́тшаго ве́лию благода́ть пред Го́сподем, и сего́ ра́ди мы, дивя́щеся, воспева́ем ти си́це:

Ра́дуйся, приходя́щим к тебе́ с ве́рою исцеле́ния источа́яй;

ра́дуйся, све́том благоче́стия мрак серде́ц озаря́яй.

Ра́дуйся, вся́каго наве́та вра́жия нас избавля́яй;

ра́дуйся, зло́бы и ко́зней бесо́вских нас огражда́яй.

Ра́дуйся, прия́телище оби́льных дарова́ний духо́вных;

ра́дуйся, кро́ткий обличи́телю страсте́й грехо́вных.

Ра́дуйся, реко́, исцеле́ний вода́ми мир ороша́ющая;

ра́дуйся, стено́, мольба́ми кре́пко нас огражда́ющая.

Ра́дуйся, я́ко в незаходи́мем Све́те при́сно пребыва́еши;

ра́дуйся, я́ко и ны́не чту́щих тя неле́ностно посеща́еши.

Ра́дуйся, Во́логодскаго кра́я неусы́пный храни́телю;

ра́дуйся, до́брый о душа́х на́ших попечи́телю.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 6

Пропове́данием Сло́ва Бо́жия, я́коже цвет кра́сный Христо́ва спаси́тельнаго се́яния, процве́л еси́ во стране́ се́верней, о́тче Алекса́ндре, благода́ть прие́мь Пресвята́го Ду́ха и Христа́ Бо́га ми́лостивое благоволе́ние, Ему́же благода́рне вопие́м: Аллилу́иа.

И́кос 6

Возсия́л еси́ житие́м твои́м доброде́тельным, преблаже́нне о́тче Алекса́ндре, ве́рныя любо́вию просвети́л еси́, наве́ты и ко́зни претерпе́л еси́, за оби́дящих тя Го́сподеви моля́ся. Те́мже мы, таково́му твоему́ незло́бию и кро́ткому нра́ву дивя́щеся, вопие́м ти си́це:

Ра́дуйся, в ску́дости су́щим ми́лости ще́дрый пода́телю;

ра́дуйся, язв и неду́гов грехо́вных му́дрый врачева́телю.

Ра́дуйся, прозорли́вче, помышле́ния челове́ческая ви́девый;

ра́дуйся, стра́сти сокрове́нныя откры́вавый и исцеля́вый.

Ра́дуйся, непра́вды людски́я в ти́хости претерпе́вый;

ра́дуйся, с наве́ты и ко́зньми в боре́нии преуспе́вый.

Ра́дуйся, отча́янных и безуте́шных приста́нище;

ра́дуйся, ни́щих пита́телю и скорбя́щих уте́шителю.

Ра́дуйся, в посте́х и труде́х мно́гих себе́ изнури́вый;

ра́дуйся, пра́вило ве́ры и о́браз терпе́ния нам яви́вый.

Ра́дуйся, у́мныя моли́твы и богомы́слия ве́рный храни́телю;

ра́дуйся, всю жизнь свою́ преда́вый в ру́це Христу́ Спаси́телю.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 7

Но́ваго ви́дяще тя избра́нника Бо́жия и слы́шаще о святе́м житии́ твое́м, блаже́нне Алекса́ндре, архипа́стыри и па́стыри, бога́тии и бе́днии, зна́тнии и про́стии, прему́дрии и убо́зии, приходя́ще к тебе́, удивля́хуся, и всем в сла́дость бысть ви́дение ли́ка твоего́ и благоуве́тливый глас духоно́сных слове́с твои́х, те́мже и воспева́ху песнь Бо́гу: Аллилу́иа.

И́кос 7

Хотя́й Человеколю́бец Госпо́дь я́ко зла́то в горни́ле испыта́ти тя, о́тче, посла́ ти не́мощи теле́сныя и боле́зни, я́же тя в ке́ллии неисхо́дно затвори́ша, е́же ти и служи́ти олтарю́ Бо́жию не мощи́, оба́че не преста́л еси́ лю́ди Христо́вы утеша́ти, вопию́щия ти такова́я:

Ра́дуйся, кро́тость и незло́бие стяжа́вый;

ра́дуйся, А́нгельскому чи́ну в житии́ свое́м подража́вый.

Ра́дуйся, согреша́ющих кро́ткий и тихогла́сный вразуми́телю;

ра́дуйся, я́рости людски́я миролюби́вый укроти́телю.

Ра́дуйся, по́двиг святы́х, я́ко путево́дную звезду́, прие́мый;

ра́дуйся, е́реси суему́дрыя и безбо́жия се́ти изобличи́вый.

Ра́дуйся, Христо́вых за́поведий пла́менный ревни́телю;

ра́дуйся, неду́гов челове́ческих му́дрый цели́телю.

Ра́дуйся, высото́ю дарова́ний не возгорди́выйся;

ра́дуйся, в простоте́ серде́чней утверди́выйся.

Ра́дуйся, звездо́ све́тлая, на небеси́ церко́внем сия́ющая;

ра́дуйся, со́лнце ди́вное, оте́чество просвеща́ющее.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 8

Стра́нное чу́до ви́дим на тебе́, богоблагода́тне, я́ко ке́ллия немощна́го Не́бо бысть, иде́же ты, блаже́нне о́тче, во всемо́щных моли́твах и моле́ниих ко Го́споду и ко Пресвяте́й Влады́чице Богоро́дице пребыва́ше. Те́мже ны́не с ли́ки святы́х Престо́лу Бо́жию предстои́ши, воспева́я: Аллилу́иа.

И́кос 8

Слы́шаще о ди́внем житии́ твое́м, о́тче Алекса́ндре, благода́рственная пе́ния возно́сим Христу́ Бо́гу на́шему, И́же дарова́ нам тя свети́льник позлаще́нный, гра́ду Во́логде похвалу́ и утвержде́ние, и сего́ ра́ди воспева́ем ти́ си́це:

Ра́дуйся, ум свой к Го́рнему при́сно простира́вый;

ра́дуйся, богомы́слием ко Творцу́ прибли́зивыйся.

Ра́дуйся, нищету́ духо́вную и кро́тость труды́ и бде́нии стяжа́вый;

ра́дуйся, о́браз целому́дреннаго и свята́го жития́ уясни́вый.

Ра́дуйся, я́ко сосу́д Пресвята́го Ду́ха нам мо́щи твоя́ святы́я оста́вил еси́;

ра́дуйся, я́ко дом Святы́я Тро́ицы показа́лся еси́.

Ра́дуйся, по́стниче, трапе́зу Ца́рствия вкуша́яй;

ра́дуйся, иере́ю Бо́жий, Первосвяще́ннику сла́ву принося́й.

Ра́дуйся, не́мощей чад твои́х не возгнуша́выйся;

ра́дуйся, душе́вною ми́лостию и любо́вию грехи́ покрыва́вый.

Ра́дуйся, путевождю́, указу́яй ве́рным путь спасе́ния;

ра́дуйся, сокро́вище кро́тости и вели́каго смире́ния.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 9

Вся́кою прему́дростию и ра́зумом Боже́ственным обогати́вся, источи́л еси́, я́ко ре́ки, словеса́ твоя́, Алекса́ндре пра́ведне, и́хже прохла́дою напои́л еси́ ду́ши, изсо́хшия страстьми́ и жа́ждущия Боже́ственныя вла́ги. Отону́дуже и воспева́ем мы тобо́ю чудоде́йствующему Бо́гу А́нгельскую песнь: Аллилу́иа.

И́кос 9

Весь освяще́н и богоно́сен показа́лся еси́, сла́вне Алекса́ндре, Богонача́льными светлостьми́ озаря́емь, отону́дуже и дар прозре́ния стяжа́л еси́, я́ко и́стинный служи́тель Бо́жий пресла́вен. Те́мже мы, духо́вная ча́да твоя́, благода́рственно взыва́ем ти си́це:

Ра́дуйся, бу́дущая, я́ко настоя́щая, предзре́вый;

ра́дуйся, дале́че су́щая, я́ко близ пребыва́ющая, прови́девый.

Ра́дуйся, та́йныя челове́к стра́сти нелицеприя́тне облича́вый;

ра́дуйся, тем ду́ши заблу́ждшия ми́лостивно вразумля́вый.

Ра́дуйся, христиа́нскаго благоче́стия и́стинный храни́телю;

ра́дуйся, му́жества и кре́пости святы́х оте́ц ревни́телю.

Ра́дуйся, не́мощи теле́сныя нивочто́ же вмени́вый;

ра́дуйся, упова́нием Небе́сных ду́шу свою́ возвесели́вый.

Ра́дуйся, о́браз нищеты́ духо́вныя ди́вно показа́вый;

ра́дуйся, сла́сти вре́менныя сла́дости ра́ди нетле́нныя презре́вый.

Ра́дуйся, ка́меню драги́й, в сокро́вищех Небе́сных сокры́тый;

ра́дуйся, би́сере многоце́нный, блиста́нием свои́м ны осиява́яй.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 10

Спасти́ хотя́ ду́шу, жизнь свою́ в ру́це Го́спода пре́дал еси́ всеконе́чне, по́мощию Того́ по́хоть пло́ти, по́хоть оче́с и го́рдость жите́йскую препобеди́л еси́, и вся, к тебе́ приходя́щия, сему́ при́сно поуча́ше: страсте́й оша́яватися, доброде́тели стяжава́ти, Бо́гу же со благодаре́нием всегда́ взыва́ти: Аллилу́иа.

И́кос 10

По́мощь и стена́ необори́ма бысть тебе́ Госпо́дь Иису́с, Его́же от млады́х ногте́й возлюби́л еси́, и сего́ ра́ди обле́клся еси́ смиренному́дрием и кро́тостию, целому́дрием и благоче́стием и про́чими да́ры Всесвята́го Ду́ха, те́мже и слы́шиши от всех такова́я:

Ра́дуйся, служи́телю Христо́в усе́рднейший;

ра́дуйся, Ева́нгелия исполни́телю изря́днейший.

Ра́дуйся, жизнь свою́ сокры́вый со Христо́м в Бо́зе;

ра́дуйся, того́ ра́ди прия́вый бесконе́чное блаже́нство.

Ра́дуйся, свети́льниче, огне́м Ду́ха Свята́го возжже́нный;

ра́дуйся, благоуха́нный цве́те, росо́ю благода́ти напое́нный.

Ра́дуйся, чистоты́ бога́тство мно́гими труды́ стяжа́вый;

ра́дуйся, целому́дрия све́тлость, я́ко мзду боле́зней твои́х, прие́мый.

Ра́дуйся, во гра́де, я́ко в пусты́ни, кре́пко подвиза́выйся;

ра́дуйся, среди́ суеты́ мирски́я ум безсобла́знен сохрани́вый.

Ра́дуйся, Це́ркве Христо́вы огнезра́чный свети́льниче;

ра́дуйся, исцеле́ний чу́дных златостру́йный исто́чниче.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 11

Пе́ние непреста́нное Бо́гови принося́, па́ству прему́дро наставля́л еси́, сло́во апо́стольское воспомина́я, я́ко мно́гими скорбьми́ подоба́ет нам стяжа́ти Ца́рствие Бо́жие, оба́че не уныва́ти в жи́зни сей, ду́хом горе́ти, Го́сподеви рабо́тати, всегда́ ра́доватися, непреста́нно моли́тися, за вся благодари́ти и пе́ти при́сно: Аллилу́иа.

И́кос 11

Све́тлых ра́йских селе́ний жи́теля и святы́х единовсе́льника яви́ тя, Алекса́ндре пра́ведне, всея́ тва́ри Созда́тель, и Небе́снаго Гра́да обита́теля, и ра́дуется о тебе́ оте́чество твое́ земно́е, Нико́льск град и вся Фиваи́да Се́верная, зря такову́ю сла́ву твою́, мы же, чту́ще тя любо́вию, вопие́м ти си́це:

Ра́дуйся, Фиваи́ды Се́верныя кри́не белообра́зный;

ра́дуйся, земли́ Ру́сския ке́дре богонасажде́нный.

Ра́дуйся, кипари́се, до Небе́с досяза́яй;

ра́дуйся, сто́лпе, оте́чество на́ше утвержда́яй.

Ра́дуйся, ду́хом предстоя́й Престо́лу Бо́жию;

ра́дуйся, пло́тию пребыва́яй с на́ми неотсту́пно.

Ра́дуйся, явле́нием моще́й твои́х ве́рных возвесели́вый;

ра́дуйся, я́ко те́ми подае́тся нам благода́ть Госпо́дня.

Ра́дуйся, то́ю благода́тию де́монов полки́ прогоня́яй;

ра́дуйся, душа́м изнуре́нным утеше́ние подава́яй.

Ра́дуйся, ра́ны и стру́пы на́ша душе́вныя умаща́яй;

ра́дуйся, зно́ем грехо́вным содержи́мым прохла́ду да́руяй.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 12

Благода́тную ве́ру и дерзнове́ние ко Го́споду стяжа́л еси́, преблаже́нне о́тче, уча́ блюсти́ вся́, ели́ка запове́да нам Христо́с: да лю́бим друг дру́га, содева́юще святы́ню во стра́се Бо́жии, помина́я на всяк день Го́спода Иису́са, воста́вшаго от ме́ртвых, по благовествова́нию апо́стол и проро́к, и́же научи́ша нас пе́ти: Аллилу́иа.

И́кос 12

Пою́ще твое́ богоуго́дное житие́, о́тче наш прехва́льне Алекса́ндре, чтим твое́ блаже́нное преставле́ние, помина́юще, я́ко честна́ смерть пра́ведных, воспева́ем прославле́ние, [лобыза́ем мо́щи твоя́ святы́я,] со умиле́нием се́рдца ти взыва́юще си́це:

Ра́дуйся, хода́таю о нас ко Пресвяте́й Тро́ице;

ра́дуйся, предста́телю наш пред Пречи́стою Богоро́дицею.

Ра́дуйся, житию́ святы́х в жи́зни твое́й поревнова́вый;

ра́дуйся, по преставле́нии с ни́ми водвори́выйся.

Ра́дуйся, небожи́телю, на земли́ нас призира́яй;

ра́дуйся, к Небесе́м ны ше́ствовати наставля́яй.

Ра́дуйся, пи́ра бра́чнаго Христо́ва прича́стниче;

ра́дуйся, Гра́да Бо́жия при́сный обита́телю.

Ра́дуйся, часть имы́й с Го́сподом Иису́сом во ве́ки;

ра́дуйся, я́ко ра́дость сия́ неизглаго́ланная не оты́мется от тебе́.

Ра́дуйся, ду́хом наслажда́яйся сла́вы неизрече́нныя;

ра́дуйся, те́лом ожида́яй о́бщаго воскресе́ния.

Ра́дуйся, о́тче Алекса́ндре, па́стырю до́брый и изря́дный уго́дниче Христо́в.

Конда́к 13

О пресла́вный уго́дниче Христо́в и те́плый моли́твенниче, пра́ведне о́тче Алекса́ндре, приими́ ра́достное сие́ моле́ние, в похвалу́ тебе́ возноси́мое, предстоя́ же Престо́лу Го́спода на́шего Иису́са Христа́, моли́ся о всех, прибега́ющих к ти и ча́ющих твоея́ по́мощи, испроси́ мир и благоде́нствие оте́честву на́шему, власте́м и во́инству его́, да вси благода́рне вопие́м Бо́гу: Аллилу́иа.

Моли́тва

О святы́й уго́дниче Бо́жий Алекса́ндре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́ва Госпо́дь всем лю́бящим Его́. Те́мже, взира́юще на ра́ку моще́й твои́х и святы́й твой о́браз, ра́дуемся о пресла́внем сконча́нии жи́тельства и чтем святу́ю па́мять твою́. Ты же, предстоя́ престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще во святы́х Свои́х сла́вимаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.